Въ сре́дꙋ пе́рвыѧ седми́цы на ᲂу҆́трени.
По а҃-мъ стїхосло́вїи сѣда́ленъ ѻ҆смогла́сника.
По в҃-мъ же стїхосло́вїи сѣда́ленъ, гла́съ в҃.
Подо́бенъ: Бл҃гоѡбра́зный і҆ѡ́сифъ:
Страстьмѝ твои́ми всѣ̑мъ безстра́стїе даѧ́й, чл҃вѣколю́бче, стра̑сти пло́ти моеѧ̀ ᲂу҆мертви́въ твои́мъ крⷭ҇то́мъ, бж҃е́ственнꙋю стрⷭ҇ть сподо́би мѧ̀ ви́дѣти, посто́мъ бл҃гоꙋгожда́юща сла́вѣ твое́й, да прїимꙋ̀ бога́тнѡ ве́лїю млⷭ҇ть.
Сла́ва, то́йже.
И҆ ны́нѣ, крⷭ҇тобг҃оро́диченъ, гла́съ то́йже.
Подо́бенъ: Милосе́рдїѧ сꙋ́щи:
Дв҃а и҆ мт҃и твоѧ̀, хрⷭ҇тѐ, на дре́вѣ зрѧ́щи тѧ̀ ме́ртва просте́рта, пла́чꙋщи го́рькѡ, глаго́лаше: сн҃е мо́й, что̀ є҆́сть стра́шное сїѐ та́инство; всѣ̑мъ да́рꙋѧй жи́знь вѣ́чнꙋю, ка́кѡ во́лею на крⷭ҇тѣ̀ ᲂу҆мира́еши сме́ртїю поноси́тельною;
По г҃-мъ стїхосло́вїи сѣда́ленъ, гла́съ в҃.
Подо́бенъ: Животворѧ́щїй крⷭ҇тъ:
Свѣтотво́рное вре́мѧ воздержа́нїѧ, є҆́же ны́нѣ ѡ҆ст҃и́лъ є҆сѝ и҆ дарова́лъ є҆сѝ на́мъ, гдⷭ҇и, ты̀ сподо́би на́мъ всѣ̑мъ во ᲂу҆миле́нїи чи́стѣ прейтѝ, ми́рствꙋющимъ, си́лою крⷭ҇та̀, є҆ди́не чл҃вѣколю́бче.
Сла́ва, то́йже.
И҆ ны́нѣ, крⷭ҇тобг҃оро́диченъ, гла́съ то́йже:
Подо́бенъ: Милосе́рдїѧ сꙋ́щи:
Чтⷭ҇ны́мъ крⷭ҇то́мъ сн҃а твоегѡ̀ сохранѧ́еми, влⷣчце чтⷭ҇аѧ бцⷣе, всѧ́кое нападе́нїе бори́телѧ всѝ ле́гцѣ ѿража́емъ. тѣ́мже тѧ̀ по до́лгꙋ ᲂу҆бл҃жа́емъ, ꙗ҆́кѡ мт҃рь свѣ́та и҆ є҆ди́нꙋ наде́ждꙋ дꙋ́шъ на́шихъ.
Та́же чте́нїе въ лаѵсаі́цѣ.
Ѱало́мъ н҃. Канѡ́нъ въ мине́и. И҆ трипѣ́снецъ, гла́съ в҃.
Пѣ́снь г҃.
І҆рмо́съ: Процвѣла̀ є҆́сть пꙋсты́нѧ:
Распне́мъ ᲂу҆́ды воздержа́нїемъ, трезви́мсѧ въ мл҃твахъ, ꙗ҆́коже пи́сано є҆́сть, и҆ жи́тельствꙋимъ по слѣ́дꙋ пострада́вшагѡ и҆ стра̑сти ᲂу҆мертви́вшагѡ.
И҆зве́ргше го́рькїй грѣ́хъ, потщи́мсѧ ᲂу҆годи́ти же́лчь во́лею вкꙋси́вшемꙋ хрⷭ҇тꙋ̀, крⷭ҇то́мъ низложи́вшемꙋ ѕлонача́льника.
Ѡ҆бы́чай взе́мъ, грѣ́хъ влече́тъ мѧ̀ во всеконе́чнꙋю па́гꙋбꙋ: но ты́ мѧ ѿ сеѧ̀ и҆зба́ви крⷭ҇то́мъ твои́мъ, ще́дре многомлⷭ҇тиве.
Бг҃оро́диченъ: Влады́чествꙋющаѧ всѣ́ми тва́рьми влⷣчце, ꙗ҆́кѡ влⷣкꙋ ро́ждшаѧ, свободѝ мѧ̀ ѿ ра́бства льсти́вомꙋ и҆ є҆ди́номꙋ бори́телю.
И҆́ный, гла́съ то́йже.
І҆рмо́съ: Оу҆твердѝ на́съ:
Дре́во крⷭ҇тное произрастѝ мі́рꙋ воздержа́нїе, є҆́же любо́вїю ѡ҆блобыза́вше, наслади́мсѧ всепло́дїѧ бж҃е́ственныхъ за́повѣдей хрⷭ҇то́выхъ.
Воздержа́нїе страсте́й и҆ ны́нѣ носѧ́ще, пло́ть распне́мъ гдⷭ҇еви, и҆ ме́ртво тоѧ̀ мꙋдрова́нїе пока́жемъ всѝ бж҃е́ственною жи́знїю.
Сла́ва, трⷪ҇ченъ: Трѝ лица̑ є҆ди́нагѡ зра́ка сла́влю, ѻ҆ц҃а̀, сн҃а и҆ дх҃а, є҆ди́нꙋ держа́вꙋ бж҃ества̀, црⷭ҇тво всѣ́хъ и҆ свѣ́тлость.
Бг҃оро́диченъ: Ржⷭ҇тво̀ твоѐ, чтⷭ҇аѧ, стра́шно бы́сть: бг҃ъ бо є҆́сть вочл҃вѣ́чивыйсѧ, безнача́льнѡ ѿ ѻ҆ц҃а̀ рожде́нный и҆ и҆з̾ тебє̀ въ послѣ̑днѧѧ без̾ мꙋ́жа роди́выйсѧ.
Сла́ва тебѣ̀, бж҃е на́шъ, сла́ва тебѣ̀.
Воспѣва́ю распѧ́тїе и҆ прободе́нїе бж҃е́ственныхъ ре́бръ твои́хъ, хрⷭ҇тѐ, и҆з̾ ни́хже питїѐ безсме́ртное че́рплю всегда̀, и҆ ѡ҆сщ҃а́юсѧ.
І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщви́вый грѣ́хъ, и҆ стра́хъ тво́й всадѝ въ сердца̀ на́съ воспѣва́ющихъ тѧ̀.
Пѣ́снь и҃.
І҆рмо́съ: Пе́щь ѻ҆́гненнаѧ въ вавѷлѡ́нѣ нѣ́когда:
Пе́щь страсте́й распалѧ́етъ дꙋ́шꙋ мою̀: но росо́ю млⷭ҇ти твоеѧ̀ сїю̀ ᲂу҆вѧдѝ, бл҃годѣ́телю, и҆сточи́вый то́ки безстра́стїѧ и҆з̾ нетлѣ́нныхъ твои́хъ ре́бръ, распина́емь мно́гагѡ ра́ди снисхожде́нїѧ.
Па́дшыѧ въ ѕло́бꙋ воздви́глъ є҆си́ ны твои́мъ на крⷭ҇тѣ̀ вознесе́нїемъ, хрⷭ҇тѐ: тѣ́мже попо́лзшасѧ въ про́пасть грѣха̀ возведѝ мѧ, и҆ ᲂу҆тверди́ на ка́мени сп҃се́нїѧ, ꙗ҆́кѡ да сла́влю держа́вꙋ твою̀.
Копїе́мъ твои́мъ, хрⷭ҇тѐ, ѡ҆чи́стивъ страсте́й гное́нїе ѿ се́рдца моегѡ̀, всего́ мѧ и҆сцѣлѝ,є҆го́же ѕмі́й ᲂу҆ѧзвѝ зꙋбы̀ ꙗ҆дови́тыми, и҆ да́ждь мѝ непоколеби́мѡ по бж҃е́ствєннымъ стезѧ́мъ ходи́ти.
Бг҃оро́диченъ: Тебѐ свѣ́тлꙋю свѣщꙋ̀, и҆ свѣ́щникъ, въ не́йже ѻ҆́гнь бж҃ества̀ все́льсѧ, просвѣтѝ ѡ҆держи̑мыѧ нощеѡбра́знымъ тлѣ́нїемъ, чти́мъ всѝ, нескве́рнаѧ, бл҃гословѧ́ще, бл҃гослове́ннаѧ, ржⷭ҇тво̀ твоѐ.
И҆́ный.
І҆рмо́съ: Въ кꙋпинѣ̀ на сїна́йстѣй горѣ̀:
Посредѣ̀ разбѡ́йникъ распѧ́таго на дре́вѣ, и҆ копїе́мъ прободе́ннаго въ животѡ́чнаѧ рє́бра, по́йте, бл҃гослови́те и҆ превозноси́те во всѧ̑ вѣ́ки.
Сꙋдѧ́й все́й землѝ, сꙋди́лищꙋ предста́лъ є҆сѝ, заꙋше́нъ бы́лъ є҆сѝ и҆ порꙋ́ганъ, на крⷭ҇тѣ̀ повѣ́шенъ бы́лъ є҆сѝ, и҆зводѧ мѧ ѿ тлѣ́нїѧ дре́внѧгѡ грѣха̀ во всѧ̑ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Бж҃ество̀ є҆ди́но, трⷪ҇це, нераздѣ́льное є҆стество̀мъ, раздѣ́льное же ли̑цы, нерꙋши́маѧ держа́во, ѻ҆́ч҃е, сн҃е и҆ дш҃е, тебѐ пѣсносло́вимъ во всѧ̑ вѣ́ки.
Бг҃оро́диченъ: Бг҃ороди́тельнице чтⷭ҇аѧ, нбⷭ҇наѧ врата̀, сп҃си́тельнаѧ две́рь, прїими моле́нїе всѣ́хъ хрⷭ҇тїа́нъ, ᲂу҆бл҃жа́ющихъ тѧ̀ во всѧ̑ вѣ́ки.
Сла́ва тебѣ̀, бж҃е на́шъ, сла́ва тебѣ̀.
Крⷭ҇те хрⷭ҇то́въ, разбо́йника наста́вивый къ вѣ́рѣ и҆ менѐ къ ре́вностномꙋ прохожде́нїю поста̀, сподо́би дости́гнꙋти поклоне́нїѧ тебѣ̀ и҆ ѡ҆животвори́тисѧ.
Хва́лимъ, бл҃гослови́мъ, покланѧ́емсѧ гдⷭ҇еви, пою́ще и҆ превозносѧ́ще во всѧ̑ вѣ́ки.
І҆рмо́съ: Въ кꙋпинѣ̀ на сїна́йстѣй горѣ̀, мѡѷсе́ю чꙋ́до дв҃ы дре́вле проѡбрази́вшаго, по́йте, бл҃гослови́те и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Безнача́льна роди́телѧ:
Со́лнца свѣтлѣ́е по́стъ возсїѧ́вый, многосвѣ́тлаѧ бл҃года́ть, бл҃говѣствꙋ́етъ всѣ̑мъ крⷭ҇тныѧ лꙋчы̀, и҆ сїѧ̑нїѧ чтⷭ҇ны́ѧ стрⷭ҇ти, и҆ воскрⷭ҇нїѧ де́нь сп҃си́тельный.
Чистотꙋ̀ возлю́бимъ, блꙋда̀ ѿбѣжи́мъ, чре́́сла цѣломꙋ́дрїемъ препоѧ́шимъ: ꙗ҆́кѡ да чи́сти ꙗ҆ви́мсѧ чтⷭ҇омꙋ и҆ є҆ди́номꙋ ѿ всѣ́хъ и҆́щꙋщемꙋ ѡ҆чище́нїѧ, сп҃сꙋ дꙋ́шъ на́шихъ.
Хрⷭ҇тѐ, стра́хомъ твои́мъ пригвоздѝ плѡ́ти моѧ̑, ко крⷭ҇тꙋ̀ пригвозди́вый грѣ́хъ а҆да́мовъ: расто́ргни ᲂу҆́зы ѕѡ́лъ мои́хъ, стрѣ́лы лꙋка́вагѡ сокрꙋшѝ копїе́мъ твои́мъ, влⷣко, и҆ ѿ вре́да тогѡ̀ и҆зба́ви мѧ̀.
Бг҃оро́диченъ: Сꙋдїю̀ пра́веднѣйшаго и҆ є҆ди́наго бл҃гоꙋвѣ́тливаго хрⷭ҇та̀ гдⷭ҇а ро́ждшаѧ, дв҃о, и҆зба́ви мѧ̀, ѻ҆трокови́це, ѿ сꙋда̀ и҆ ѻ҆гнѧ̀ и҆ мꙋче́нїѧ, ꙗ҆̀же мѝ и҆схода́таи грѣха̀ наслажде́нїе.
И҆́ный.
І҆рмо́съ: Чтⷭ҇ꙋю и҆ пречⷭ҇тꙋю:
Ѽ бл҃госе́рдїѧ твоегѡ̀! занѐ крⷭ҇тъ претерпѣ́лъ є҆сѝ, гво́здїе и҆ копїѐ, гдⷭ҇и, менє̀ ра́ди ѡ҆сꙋжде́ннагѡ тлѣ́нїю. тѣ́мже воспѣва́ю тѧ, хрⷭ҇тѐ.
Крⷭ҇тꙋ̀, тро́сти, гво́здїємъ и҆ копїю̀, животвѡ́рнымъ твои̑мъ стрⷭ҇те́мъ покланѧ́ющесѧ, хрⷭ҇тѐ,всѝ лю́дїе въ пѣ́снехъ воспѣва́емъ тѧ̀.
Сла́ва, трⷪ҇ченъ: Є҆ди́нице трїѷпоста́снаѧ, трⷪ҇це є҆ди́нственнаѧ, гдⷭ҇онача́льнаѧ, є҆стество̀ равносла́вное, ѻ҆́ч҃е, сн҃е и҆ бж҃е́ственный дш҃е, сп҃сѝ всѧ̑ ны̀.
Бг҃оро́диченъ: Ра́дꙋйсѧ, бцⷣе, ѡ҆чисти́лище мі́рꙋ, въ не́же прибѣга́юще всѝ грѣ́шнїи, къ бг҃ꙋ примирє́нїѧ при́снѡ ѡ҆брѣта́емъ.
Сла́ва тебѣ̀, бж҃е на́шъ, сла́ва тебѣ̀.
Крⷭ҇то́мъ твои́мъ, гдⷭ҇и, и҆ менѐ ᲂу҆крѣпи́въ, постѡ́въ тече́нїе мнѣ̀ да́рꙋй, бл҃же, бл҃гомо́щнѡ сконча́ти.
І҆рмо́съ: Чтⷭ҇ꙋю и҆ пречⷭ҇тꙋю мт҃рь и҆ дв҃ꙋ, пѣ́сньми пѣ́сней, всѝ вѣ́рнїи, ꙗ҆́кѡ бцⷣꙋ бл҃гоче́стнѡ велича́емъ.
Свѣти́ленъ.
На стїхо́внѣ самогла́сенъ два́жды. Гла́съ и҃:
Посто́мъ стра̑сти помышле́нїй, прїиди́те, порабо́тимъ, дꙋхо́вными кри́лы себѐ покры́вше: да вра́жїю дви́жимꙋю бꙋ́рю ле́гцѣ преше́дше, досто́йни бꙋ́демъ поклоне́нїѧ крⷭ҇тꙋ за мі́ръ закла́ннагѡ во́лею сн҃а бж҃їѧ, и҆ дх҃о́внѡ пра́зднꙋемъ сп҃сово и҆з̾ ме́ртвыхъ воскрⷭ҇нїе: на го́рꙋ со ᲂу҆ч҃нки̑ возше́дше, просла́вимъ прїи́мшаго ѿ ѻ҆ц҃а̀ всѧ́кꙋ вла́сть, сн҃а чл҃вѣколю́бца.
Мч҃нченъ: Мч҃нцы хрⷭ҇тѡ́вы непобѣди́мїи, побѣди́вше прельще́нїе си́лою крⷭ҇тною, воспрїѧ́сте бл҃года́ть вѣ́чныѧ жи́зни: преще́нїѧ мꙋчи́телей не ᲂу҆боѧ́стесѧ, мꙋ́ками ᲂу҆ранѧ́еми веселисте́сѧ: и҆ ны́нѣ крѡ́ви ва́шѧ бы́ша и҆сцѣлє́нїѧ дꙋ́шъ на́шихъ: моли́те сп҃сти́сѧ дꙋша́мъ на́шымъ.
Сла́ва, и҆ ны́нѣ, крⷭ҇тобг҃оро́диченъ, гла́съ то́йже:
Что̀ є҆́сть зри́мое видѣ́нїе, є҆́же мои́ми ѻ҆чесы̀ зри́тсѧ, ѽ влⷣко; содержа́й всю̀ тва́рь, на дре́во вознесе́нъ є҆сѝ, и҆ ᲂу҆мерщвле́нъ є҆сѝ, всѣ̑мъ да́рꙋѧй жи́знь: бцⷣа всечтⷭ҇аѧ пла́чꙋщи глаго́лаше, є҆гда̀ зрѧ́ше на крⷭ҇тѣ̀ бг҃а и҆ чл҃вѣ́ка, и҆з̾ неѧ̀ неизрече́ннѡ возсїѧ́вшаго.
И҆ ча́съ а҃-й, со стїхосло́вїемъ и҆ ѡ҆бы́чными поклѡ́ны: и҆ ѿпꙋ́стъ.
На ѕ҃-мъ часѣ̀, тропа́рь прⷪ҇ро́чества, гла́съ д҃:
Вѣ́си созда́нїе на́ше, вѣ́си не́мощь на́шꙋ, чл҃вѣколю́бче: согрѣши́хомъ, но не ѿстꙋпи́хомъ ѿ тебє̀, бж҃е, нижѐ воздѣ́хомъ рꙋ́ки на́шѧ къ бо́гꙋ чꙋжде́мꙋ. пощадѝ на́съ твое́ю бл҃гостїю, бл҃госе́рде.
И҆ повторѧ́емъ то́йже.
Та́же прокі́менъ, ѱало́мъ ѳ҃, гла́съ д҃: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ.
Сті́хъ: Возвеселю́сѧ и҆ возра́дꙋюсѧ ѡ҆ тебѣ̀.
Прⷪ҇ро́чества и҆са́їина чте́нїе. [Глава̀ в҃, ст. г҃-а҃і.]
Та́кѡ глаго́летъ гдⷭ҇ь: ѿ сїѡ́на и҆зы́детъ зако́нъ, и҆ сло́во гдⷭ҇не и҆з̾ і҆ерⷭ҇ли́ма. И҆ сꙋди́ти бꙋ́детъ посредѣ̀ ꙗ҆зы̑къ, и҆ и҆з̾ѡбличи́тъ лю́ди мнѡ́ги: и҆ раскꙋю́тъ мечи̑ своѧ̑ на ѡ҆ра̑ла, и҆ ко́пїѧ своѧ̑ на серпы̀, и҆ не во́зьметъ ꙗ҆зы́къ на ꙗ҆зы́къ меча̀, и҆ не навы́кнꙋтъ ктомꙋ̀ ра́товатисѧ. И҆ ны́нѣ, до́ме і҆а́кѡвль, прїиди́те, по́йдемъ свѣ́томъ гдⷭ҇нимъ. Ѡ҆ста́ви бо лю́ди своѧ̑ до́мъ і҆а́кѡвль: занѐ ꙗ҆́коже и҆з̾ нача́ла напо́лнисѧ страна̀ и҆́хъ волхвова́нїй, ꙗ҆́коже и҆ноплеме́нникѡвъ, и҆ ча̑да мнѡ́га и҆ноплемє́ннича роди́шасѧ и҆́мъ. Напо́лнисѧ бо страна̀ и҆́хъ сребра̀ и҆ зла́та, и҆ не бѧ́ше числа̀ сокро́вищъ и҆́хъ: и҆ напо́лнисѧ землѧ̀ и҆́хъ ко́ней, и҆ не бѧ́ше числа̀ колесни́цъ и҆́хъ: и҆ наполни́сѧ землѧ̀ ме́рзостей дѣ́лъ рꙋ́къ и҆́хъ, и҆ поклони́шасѧ тѣ̑мъ, ꙗ҆̀же сотвори́ша пе́рсты и҆́хъ: и҆ преклони́сѧ человѣ́къ, и҆ смири́сѧ мꙋ́жъ, и҆ не претерплю̀ и҆̀мъ. И҆ ны́нѣ вни́дите въ ка́мєнїѧ, и҆ скры́йтесѧ въ зе́млю ѿ лица̀ стра́ха гдⷭ҇нѧ и҆ ѿ сла́вы крѣ́пости є҆гѡ̀, є҆гда̀ воста́нетъ сокрꙋши́ти зе́млю. Ѻ҆́чи бо гдⷭ҇ни высо́цы, человѣ́къ же смире́нъ: и҆ смири́тсѧ высота̀ человѣ́ческаѧ, и҆ вознесе́тсѧ гдⷭ҇ь є҆ди́нъ въ де́нь ѻ҆́ный.
Прокі́менъ, ѱало́мъ і҃. Гла́съ ѕ҃:
Пра́веденъ гдⷭ҇ь, и҆ пра̑вды возлюбѝ, правѡты̀ ви́дѣ лицѐ є҆гѡ̀. Сті́хъ: На гдⷭ҇а ᲂу҆пова́хъ, ка́кѡ рече́те дꙋшѝ мое́й;
И҆ про́чее послѣ́дованїе часѡ́въ, ꙗ҆́кѡ пред̾ꙋчини́сѧ, и҆ ѿпꙋ́стъ.
Въ сре́дꙋ пе́рвыѧ седми́цы ве́чера,
є҆гда̀ быва́етъ преждеѡсщ҃е́ннаѧ, твори́тъ сщ҃е́нникъ на є҆ди́номъ ко́емждо а҆нтїфѡ́нѣ стїхосло́вїѧ ма́лꙋю є҆ктенїю̀. На Гдⷭ҇и воззва́хъ, поста́вимъ стїхѡ́въ і҃, ѿ И҆зведѝ и҆з̾ темни́цы дꙋ́шꙋ мою̀: на гла́съ самогла́сна днѐ, повторѧ́юще то́йжде. Та́же мч҃нченъ въ то́йже гла́съ: та́же г҃ подо́бны трїѡ́ди: и҆ г҃ мине́и, повторѧ́юще є҆ди́нъ. Самогла́сенъ днѐ.
Гла́съ и҃: Постѧ́щесѧ, бра́тїе, тѣле́снѣ, пости́мсѧ и҆ дх҃о́внѣ: разрꙋши́мъ всѧ́кїй сою́зъ непра́вды: расто́ргнемъ сѣ̑ти наси́льныхъ соглаше́нїй: всѧ́кое писа́нїе непра́ведное раздере́мъ: дади́мъ а҆́лчꙋщымъ хлѣ́бъ, и҆ ни́щыѧ безкрѡ́вныѧ введе́мъ въ до́мы: да прїи́мемъ ѿ хрⷭ҇та̀ бг҃а ве́лїю млⷭ҇ть. [Два́жды].
Та́же мч҃нченъ: А҆́ще ка́ѧ добродѣ́тель и҆ а҆́ще ка́ѧ похвала̀, подоба́етъ ст҃ы̑мъ: мечє́мъ бо преклони́ша вы̑и, тебє̀ ра́ди прекло́ньшагѡ нб҃са̀ и҆ соше́дшагѡ: и҆злїѧ́ша крѡ́ви своѧ̑, тебє̀ ра́ди и҆стощи́вшагѡ себѐ и҆ зра́къ раба̀ прїи́мшагѡ: смири́шасѧ да́же до сме́рти, нищетѣ̀ твое́й подража́юще. и҆́хже мл҃твами, по мно́жествꙋ щедро́тъ твои́хъ, бж҃е, поми́лꙋй на́съ.
Та́же господи́на і҆ѡ́сифа, гла́съ в҃.
Подо́бенъ: Ꙗ҆́кѡ ꙗ҆ви́лсѧ є҆сѝ, хрⷭ҇тѐ:
Ва́съ ꙗ҆́кѡ свѣтолꙋ̑чныѧ мѡ́лнїи въ ве́сь мі́ръ посла́въ і҆и҃съ, мы́сленное вои́стиннꙋ со́лнце, ѿгна́лъ є҆́сть свѣтлостьмѝ ва́шеѧ бж҃е́ственныѧ про́повѣди тьмꙋ̀ прельще́нїѧ, бг҃ови́дцы а҆пⷭ҇ли, и҆ просвѣтѝ держи̑мыѧ лю́тѣ во мра́цѣ невѣ́дѣнїѧ. того̀ ᲂу҆̀бо моли́те, низпосла́ти и҆ на́мъ просвѣще́нїе и҆ ве́лїю млⷭ҇ть.
Дрꙋгі́й, тогѡ́же.
На колесни́цꙋ бж҃е́ственнꙋю добродѣ́телей и҆лїа̀ возше́дъ, посто́мъ просвѣти́всѧ, возноша́шесѧ на высотꙋ̀ нбⷭ҇нꙋю. семꙋ̀ поревнꙋ́й, смире́ннаѧ дꙋшѐ моѧ̀, и҆ пости́сѧ ѿ всѧ́кїѧ ѕло́бы, и҆ за́висти, и҆ сва́ры, и҆ сла́дости мимотекꙋ́щїѧ и҆ сла́стныѧ: ꙗ҆́кѡ да и҆збѣ́гнеши болѣ́зни лю́тыѧ, вѣ́чнꙋющїѧ гее́нны, вопїю́щи хрⷭ҇тꙋ̀: гдⷭ҇и, сла́ва тебѣ̀.
Дрꙋгі́й, господи́на ѳео́дѡра, гла́съ є҃.
Подо́бенъ: Прпⷣбне ѻ҆́тче:
А҆пⷭ҇ли бж҃е́ственнїи, мі́рꙋ теплѣ́йшїи мл҃твєнницы и҆ правосла̑внымъ защити́телїе, и҆мꙋ́ще вла́сть дерзнове́нїѧ ко хрⷭ҇тꙋ̀ бг҃ꙋ на́шемꙋ, ѡ҆ на́съ моли́тесѧ, мо́лимъ вы̀, всечестні́и, да бл҃го́е вре́мѧ постѡ́въ свѣ́тлѡ сотвори́мъ, и҆ бл҃года́ть є҆диносꙋ́щныѧ трⷪ҇цы прїи́мемъ. великопроповѣ̑дницы сла́внїи, моли́тесѧ ѡ҆ дꙋша́хъ на́шихъ.
И҆ мине́и д҃. Сла́ва, и҆ ны́нѣ, бг҃оро́диченъ. И҆ быва́етъ вхо́дъ съ кади́льницею, без̾ є҆ѵⷢ҇лїа [є҆гда́ же и҆́мать чести́сѧ є҆ѵⷢ҇лїе, тогда̀ и҆ со є҆ѵⷢ҇лїемъ]. Свѣ́те ти́хїй:
Прокі́менъ, ѱало́мъ а҃і, гла́съ є҃.
Ты̀, гдⷭ҇и, сохрани́ши ны̀ и҆ соблюде́ши ны̀ ѿ ро́да сегѡ̀ и҆ во вѣ́къ. Сті́хъ: Сп҃си́ мѧ, гдⷭ҇и, ꙗ҆́кѡ ѡ҆скꙋдѣ̀ прпⷣбный.
Бытїѧ̀ чте́нїе. [Гл. а҃, ст. к҃д-л҃а: гл. в҃, ст. а҃-г҃.]
Речѐ бг҃ъ: да и҆зведе́тъ землѧ̀ дꙋ́шꙋ жи́вꙋ по ро́дꙋ, четверонѡ́гаѧ и҆ га́ды, и҆ ѕвѣ̑ри землѝ по ро́дꙋ. И҆ бы́сть та́кѡ. И҆ сотворѝ бг҃ъ ѕвѣ̑ри землѝ по ро́дꙋ, и҆ скоты̀ по ро́дꙋ и҆́хъ, и҆ всѧ̑ га́ды землѝ по ро́дꙋ и҆́хъ: и҆ ви́дѣ бг҃ъ, ꙗ҆́кѡ дѡбра̀. И҆ речѐ бг҃ъ: сотвори́мъ человѣ́ка по ѡ҆́бразꙋ на́шемꙋ и҆ по подо́бїю: и҆ да ѡ҆блада́етъ ры́бами морски́ми, и҆ пти́цами небе́сными, [и҆ ѕвѣрьмѝ,] и҆ скота́ми, и҆ все́ю земле́ю, и҆ всѣ́ми га̑ды пресмыка́ющимисѧ по землѝ. И҆ сотворѝ бг҃ъ человѣ́ка, по ѡ҆́бразꙋ бж҃їю сотворѝ є҆го̀: мꙋ́жа и҆ женꙋ̀ сотворѝ и҆́хъ. И҆ бл҃гословѝ и҆́хъ бг҃ъ, глаго́лѧ: расти́тесѧ и҆ мно́житесѧ, и҆ напо́лните зе́млю, и҆ госпо́дствꙋйте є҆́ю, и҆ ѡ҆блада́йте ры́бами морски́ми, [и҆ ѕвѣрьмѝ,] и҆ пти́цами небе́сными, и҆ всѣ́ми скота́ми, и҆ все́ю земле́ю, и҆ всѣ́ми га̑ды пресмыка́ющимисѧ по землѝ. И҆ речѐ бг҃ъ: сѐ да́хъ ва́мъ всѧ́кꙋю травꙋ̀ сѣ́меннꙋю, сѣ́ющꙋю сѣ́мѧ, є҆́же є҆́сть верхꙋ̀ землѝ всеѧ̀: и҆ всѧ́кое дре́во, є҆́же и҆́мать въ себѣ̀ пло́дъ сѣ́мене сѣ́меннагѡ, ва́мъ бꙋ́детъ въ снѣ́дь: и҆ всѣ̑мъ ѕвѣрє́мъ земны̑мъ, и҆ всѣ̑мъ пти́цамъ небє́снымъ, и҆ всѧ́комꙋ га́дꙋ пресмыка́ющемꙋсѧ по землѝ, и҆́же и҆́мать въ себѣ̀ дꙋ́шꙋ жи́зни, и҆ всѧ́кꙋ травꙋ̀ зеле́нꙋю въ снѣ́дь. И҆ бы́сть та́кѡ. И҆ ви́дѣ бг҃ъ всѧ̑, є҆ли́ка сотворѝ: и҆ сѐ дѡбра̀ ѕѣлѡ̀. И҆ бы́сть ве́черъ, и҆ бы́сть ᲂу҆́тро, де́нь шесты́й. И҆ соверши́шасѧ не́бо и҆ землѧ̀, и҆ всѐ ᲂу҆краше́нїе и҆́хъ. И҆ совершѝ бг҃ъ въ де́нь шесты́й дѣла̀ своѧ̑, ꙗ҆̀же сотворѝ: и҆ почѝ въ де́нь седмы́й ѿ всѣ́хъ дѣ́лъ свои́хъ, ꙗ҆̀же сотворѝ. И҆ бл҃гословѝ бг҃ъ де́нь седьмы́й, и҆ ѡ҆ст҃ѝ є҆го̀: ꙗ҆́кѡ въ то́й почѝ ѿ всѣ́хъ дѣ́лъ свои́хъ, ꙗ҆̀же нача́тъ бг҃ъ твори́ти.
Прокі́менъ, ѱало́мъ в҃і, гла́съ ѕ҃: При́зри и҆ ᲂу҆слы́ши мѧ̀, гдⷭ҇и бж҃е мо́й. Сті́хъ: Доко́лѣ, гдⷭ҇и, забꙋ́деши мѧ̀ до конца̀; доко́лѣ ѿвраща́еши лицѐ твоѐ ѿ менє̀; И҆ посе́мъ возглаша́етъ дїа́конъ: Повели́те. Сщ҃е́нникъ же взе́мъ ѻ҆бѣ́ма рꙋка́ма кади́льницꙋ и҆ свѣ́щникъ со свѣще́ю, стои́тъ пред̾ ст҃о́ю трапе́зою зрѧ̀ къ восто́кѡмъ, и҆ назна́менꙋѧ крⷭ҇тъ, глаго́летъ: Премꙋ́дрость, про́сти. Та́же ѡ҆брати́всѧ на за́падъ къ наро́дꙋ, глаго́летъ: Свѣ́тъ хрⷭ҇то́въ просвѣща́етъ всѣ́хъ.
Чте́цъ: При́тчей чте́нїе. Дїа́конъ: Во́нмемъ. [Глава̀ в҃, ст. а҃-к҃в.]
Сы́не, а҆́ще прїи́мъ глаго́лъ моеѧ̀ за́повѣди, скры́еши въ себѣ̀: послꙋ́шаетъ премꙋ́дрости твоѐ ᲂу҆́хо, и҆ приложи́ши се́рдце твоѐ къ ра́зꙋмꙋ: приложи́ши же є҆̀ въ наказа́нїе сы́нꙋ твоемꙋ̀. А҆́ще бо премꙋ́дрость призове́ши, и҆ ра́зꙋмꙋ да́си гла́съ тво́й, чꙋ́вство же взы́щеши вели́кимъ гла́сомъ: и҆ а҆́ще взы́щеши є҆ѧ̀ ꙗ҆́кѡ сребра̀, и҆ ꙗ҆́коже сокро́вище и҆спыта́еши ю҆̀: тогда̀ ᲂу҆разꙋмѣ́еши стра́хъ гдⷭ҇нь, и҆ позна́нїе бж҃їе ѡ҆брѧ́щеши. Ꙗ҆́кѡ гдⷭ҇ь дае́тъ премꙋ́дрость, и҆ ѿ лица̀ є҆гѡ̀ позна́нїе и҆ ра́зꙋмъ: и҆ сокро́виществꙋетъ и҆справлѧ́ющымъ сп҃се́нїе, защища́етъ же ше́ствїе и҆́хъ, є҆́же сохрани́ти пꙋти̑ ѡ҆правда́нїй: и҆ пꙋ́ть бл҃гоговѣ́инствꙋющихъ є҆гѡ̀ сохрани́тъ. Тогда̀ ᲂу҆разꙋмѣ́еши пра́вдꙋ и҆ сꙋ́дъ, и҆ и҆спра́виши всѧ̑ стєзѝ бл҃гі̑ѧ. А҆́ще бо прїи́детъ премꙋ́дрость въ твою̀ мы́сль, чꙋ́вство же твое́й дꙋшѝ добро̀ бы́ти возмни́тсѧ: совѣ́тъ до́бръ сохрани́тъ тѧ̀, помышле́нїе же преподо́бное соблюде́тъ тѧ̀: да и҆зба́витъ тѧ̀ ѿ пꙋтѝ ѕла́гѡ и҆ ѿ мꙋ́жа глаго́люща ничто́же вѣ́рно. ѽ ѡ҆ста́вившїи пꙋти̑ пра̑выѧ, є҆́же ходи́ти въ пꙋте́хъ тьмы̀! ѽ веселѧ́щїисѧ ѡ҆ ѕлы́хъ и҆ ра́дꙋющїисѧ ѡ҆ развраще́нїи ѕлѣ́мъ! и҆́хже стєзѝ стро́пѡтны, и҆ кри̑ва течє́нїѧ и҆́хъ, є҆́же дале́че тѧ̀ сотвори́ти ѿ пꙋтѝ пра́вагѡ, и҆ чꙋ́жда ѿ пра́веднагѡ ра́зꙋма. Сы́не, да тѧ̀ не пости́гнетъ совѣ́тъ ѕлы́й, ѡ҆ставлѧ́ѧй ᲂу҆че́нїе ю҆́ности, и҆ завѣ́та бж҃е́ственнагѡ забы́вый. Поста́ви бо при сме́рти до́мъ сво́й, и҆ при а҆́дѣ съ земны́ми дѣѧ̑нїѧ своѧ̑. Всѝ ходѧ́щїи по немꙋ̀ не возвратѧ́тсѧ, нижѐ пости́гнꙋтъ сте́зь пра́выхъ: ни бо дости́гнꙋтъ лѣ́тъ жи́зни. А҆́ще бо бы́ша ходи́ли въ стєзѝ бл҃гі̑ѧ, ѡ҆брѣлѝ ᲂу҆́бѡ бы́ша стєзѝ пра̑вы гла̑дки: бла́зи бꙋ́дꙋтъ жи́тєли на землѝ, неѕло́бивїи же ѡ҆ста́нꙋтъ на не́й. Ꙗ҆́кѡ пра́вїи вселѧ́тсѧ на землѝ, и҆ прпⷣбнїи ѡ҆ста́нꙋтъ на не́й. Пꙋтїѐ нечести́выхъ ѿ землѝ поги́бнꙋтъ, пребеззако́ннїи же и҆зри́нꙋтсѧ ѿ неѧ̀.
И҆ по и҆сполне́нїи парїмі́й глаго́летъ сщ҃е́нникъ: Ми́ръ тѝ. И҆ дїа́конъ: Премꙋ́дрость.Чте́цъ: Да и҆спра́витсѧ мл҃тва моѧ̀:
Тогда̀ пра́вагѡ и҆ лѣ́вагѡ кли́росѡвъ, и҆ предстоѧ́й наро́дъ, ѻ҆́бѣ страны̑ во все́й це́ркви стоѧ́тъ на колѣ́нахъ молѧ́щесѧ. И҆ по пѣ́нїи чтеца̀, пе́рвый ли́къ пое́тъ то́жде: Да и҆спра́витсѧ мл҃тва моѧ̀: И҆ чте́цъ, и҆ дрꙋга́ѧ страна̀ ли́ка, и҆ предстоѧ́й наро́дъ, стоѧ́тъ на колѣ́нахъ, до́ндеже пропою́тъ. Та́же чте́цъ пое́тъ а҃ сті́хъ: Гдⷭ҇и, воззва́хъ къ тебѣ̀, ᲂу҆слы́ши мѧ̀: И҆ по пропѣ́тїи стїха̀, пое́тъ вторы́й ли́къ: Да и҆спра́витсѧ мл҃тва моѧ̀: Тогда̀ чте́цъ, и҆ пе́рвый ли́къ, и҆ тоѧ̀ страны̀ предстоѧ́й наро́дъ, припа́даютъ на колѣ̑на. Та́же чте́цъ пое́тъ вторы́й сті́хъ: Положѝ, гдⷭ҇и, хране́нїе: И҆ пе́рвый ли́къ па́ки пое́тъ: Да и҆спра́витсѧ мл҃тва моѧ̀: И҆ чте́цъ, и҆ вторы́й ли́къ, и҆ предстоѧ́й наро́дъ па́ки приклонѧ́ютъ колѣ̑на. И҆ па́ки чте́цъ пое́тъ тре́тїй сті́хъ: Не ᲂу҆клонѝ се́рдце моѐ: и҆ вторы́й ли́къ пое́тъ: Да и҆спра́витсѧ мл҃тва моѧ̀: и҆ приклонѧ́етъ кѡлѣ̑на чте́цъ, и҆ пе́рвый ли́къ, и҆ наро́дъ. И҆ па́ки чте́цъ: пое́тъ: Да и҆спра́витсѧ мл҃тва моѧ̀, ꙗ҆́кѡ кади́ло, пред̾ тобо́ю: И҆ тогда̀ ѻ҆́ба ли̑ка и҆ въ це́ркви предстоѧ́й ве́сь наро́дъ припа́даютъ на кѡлѣ̑на, и҆ стоѧ́тъ, до́ндеже чте́цъ пое́тъ, и҆ воста́вше допѣва́ютъ на кли́росѣ: Воздѣѧ́нїе рꙋкꙋ̀ моє́ю же́ртва вече́рнѧѧ. И҆ по и҆сполне́нїи твори́мъ покло́ны г҃.
[Зрѝ] А҆́ще пра́здникъ ѡ҆брѣ́тенїѧ чтⷭ҇ны́ѧ главы̀, и҆лѝ ст҃ы́хъ м҃ мч҃нкъ, тогда̀ по сконча́нїи, Да и҆спра́витсѧ мл҃тва моѧ̀: а҆́бїе ст҃ы̑мъ вратѡ́мъ ѿвє́рстымъ, пое́мъ прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе, и҆ про́чее по ѡ҆бы́чаю. Кромѣ́ же пра́здника, по Да и҆спра́витсѧ: дїа́конъ є҆ктенїю̀, и҆ сщ҃е́нникъ мл҃твы прилє́жныѧ. Мы́ же твори́мъ покло́ны г҃. И быва́етъ про́чее послѣ́дованїе преждеѡсщ҃е́нныхъ по чи́нꙋ, ꙗ҆́коже въ слꙋже́бницѣхъ и҆з̾ѧви́сѧ.
[Зрѝ] Вѣ́дати подоба́етъ, ꙗ҆́кѡ по и҆схожде́нїи ст҃ы́хъ дарѡ́въ, и҆сполнѧ́емꙋ, Ны́нѣ си̑лы нбⷭ҇ныѧ: твори́мъ покло́ны г҃, непокрове́ни сꙋ́ще.
[Зрѝ] Вѣ́домо же бꙋ́ди, ꙗ҆́кѡ, є҆гда̀ прено́сѧтсѧ бж҃е́ствєнныѧ та̑йны, всѝ лю́дїе и҆ пѣвцы̀, ни́цъ па́дше, хрⷭ҇тꙋ̀ бг҃ꙋ въ та́йнахъ сꙋ́щемꙋ, поклоне́нїе творѧ́тъ бг҃ꙋ подоба́ющее: поне́же соверше́ннѡ ѡсщ҃є́ны сꙋ́ть.
Кїнѡні́къ: Вкꙋси́те и҆ ви́дите, ꙗ҆́кѡ бл҃гъ гдⷭ҇ь. А҆ллилꙋ́їа, три́жды. По ѿверзе́нїи же вра́тъ, рече́тъ дїа́конъ: Со стра́хомъ бж҃їимъ и҆ вѣ́рою пристꙋпи́те. Мы́ же покло́нъ є҆ди́нъ: И҆ пое́мъ: Бл҃гословлю̀ гдⷭ҇а на всѧ́кое вре́мѧ, хвала̀ є҆гѡ̀ во ᲂу҆стѣ́хъ мои́хъ. По возглаше́нїи же ѿ і҆ере́а: Всегда̀, ны́нѣ и҆ при́снѡ: Ли́къ: Да и҆спо́лнѧтсѧ ᲂу҆ста̀ на̑ша: А҆ллилꙋ́їа, три́жды. По заамвѡ́ннѣй же мл҃твѣ: Бꙋ́ди и҆́мѧ гдⷭ҇не: И҆ мета̑нїѧ трѝ. Ѱало́мъ л҃г: Бл҃гословлю̀ гдⷭ҇а на всѧ́кое вре́мѧ: И҆ подае́тсѧ на́мъ а҆нті́дѡръ. И҆ соверше́нный ѿпꙋ́стъ.
Сїѐ послѣ́дованїе быва́етъ во всю̀ четыредесѧ́тницꙋ, преждесщ҃е́ннѣй сꙋ́щей. А҆ и҆дѣ́же нѣ́сть преждесщ҃е́нныѧ, пою́тсѧ на вече́рни стїхи̑ры на ѕ҃: подо́бенъ въ трїѡ́ди, и҆ въ мине́и. Сла́ва, и҆ ны́нѣ, бг҃оро́диченъ, по гла́сꙋ мине́и. На стїхо́внѣ, въ трїѡ́ди самогла́сенъ днѐ два́жды: и҆ мч҃нченъ, и҆́же є҆́сть на Гдⷭ҇и воззва́хъ. Сла́ва, и҆ ны́нѣ, бг҃оро́диченъ, тогѡ́же гла́са. И҆ ѡ҆бы́чное конча́нїе.
Входѧ́ще же въ трапе́зꙋ, ꙗ҆ди́мъ сꙋхоѧде́нїе, пїе́мъ и҆ со́къ съ ме́домъ. Въ четверто́къ же тоѧ̀ седми́цы трапе́зы не поставлѧ́емъ, но быва́емъ постѧ́щесѧ да́же до пѧтка̀: тогда́ бо ꙗ҆ди́мъ входѧ́ще въ трапе́зꙋ.
Въ сре́дꙋ а҃-ѧ седми́цы на повече́рїи.
Нача́ло, ꙗ҆́коже въ мимоше́дшихъ дне́хъ: и҆ пое́мъ настоѧ́щїй вели́кїй канѡ́нъ прпⷣбнагѡ ѻ҆тца̀ на́шегѡ а҆ндре́а кри́тскагѡ, і҆ерꙋсали́мскагѡ. Гла́съ ѕ҃. І҆рмосы̀ по два́жды: Твори́мъ же на ко́емждо тропарѣ̀ мета̑нїѧ трѝ, глаго́люще и҆ сті́хъ: Поми́лꙋй мѧ̀, бж҃е, поми́лꙋй мѧ̀.
Пѣ́снь а҃.
І҆рмо́съ: Помо́щникъ и҆ покрови́тель:
Ѿ ю҆́ности, хрⷭ҇тѐ, за́пѡвѣди твоѧ̑ престꙋпи́хъ, небрегі́й, лѣнѧ́сѧ, стра́стнѡ преидо́хъ всѐ житїѐ. тѣ́мже зовꙋ́ ти, сп҃се: понѐ на концѣ̀ сп҃си́ мѧ.
Пове́ржена менѐ пред̾ враты̀ твои́ми, сп҃се, понѐ на ста́рости не ѿри́ни во а҆́дъ тща̀, но пре́жде конца̀, ꙗ҆́кѡ чл҃вѣколю́бецъ, да́ждь мѝ прегрѣше́нїй ѡ҆ставле́нїе.
Бога́тство моѐ, сп҃се, расточи́въ въ блꙋдѣ̀, пꙋ́стъ є҆́смь плодѡ́въ бл҃гочести́выхъ, гла́денъ же зовꙋ̀: ѻ҆́ч҃е щедро́тъ, предвари́въ ты́ мѧ ᲂу҆ще́дри.
Въ разбо́йники впады́й а҆́зъ є҆́смь помышле́ньми мои́ми, ве́сь ѿ ни́хъ ᲂу҆ѧзви́хсѧ ны́нѣ, и҆ и҆спо́лнихсѧ ра́нъ: но са́мъ мѝ предста́въ, хрⷭ҇тѐ сп҃се, и҆сцѣлѝ.
Сщ҃е́нникъ мѧ̀ пре́жде ви́дѣвъ мимои́де, и҆ леѵі́тъ ви́дѧ въ лю́тыхъ на́га презрѣ̀: но ты,̀ и҆з̾ мр҃і́и возсїѧ́вый і҆и҃се, предста́въ ᲂу҆ще́дри мѧ̀.
Прпⷣбнаѧ ма́ти марі́е, молѝ бг҃а ѡ҆ на́съ.
Ты́ да́ждь ми, марі́е, свѣтоза́рнꙋю бл҃года́ть ѿ бж҃е́ственнагѡ свы́ше промышле́нїѧ, и҆збѣжа́ти ѡ҆мраче́нїѧ страсте́й и҆ пѣ́ти ᲂу҆се́рднѡ кра̑сныѧ пѡ́вѣсти житїѧ̀ твоегѡ̀.
Сла́ва, трⷪ҇ченъ: Пресꙋ́щнаѧ трⷪ҇це, во є҆ди́ницѣ покланѧ́емаѧ, возьмѝ ѿ менє̀ вре́мѧ тѧ́жкое грѣхо́вное, и҆ ꙗ҆́кѡ бл҃госе́рда, да́ждь мѝ сле́зы ᲂу҆миле́нїѧ.
Бг҃оро́диченъ: Бцⷣе, наде́ждо и҆ предста́тельство тебѐ пою́щихъ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ влⷣчца чтⷭ҇аѧ, ка́ющасѧ прїими́ мѧ.
Пѣ́снь в҃.
І҆рмо́съ: Вонмѝ, нб҃о, и҆ возглаго́лю:
Поползо́хсѧ ꙗ҆́кѡ дв҃дъ невозде́ржнѡ, и҆ ѡ҆скверни́хсѧ: но ѡ҆мы́й и҆ менѐ, сп҃се, слеза́ми мои́ми.
Ни сле́зъ, нижѐ покаѧ́нїѧ и҆́мамъ, нижѐ ᲂу҆миле́нїѧ: са́мъ мѝ сїѧ̑, сп҃се, ꙗ҆́кѡ бг҃ъ да́рꙋй.
Погꙋби́хъ первозда́ннꙋю добро́тꙋ и҆ бл҃голѣ́пїе моѐ: и҆ ны́нѣ лежꙋ̀ на́гъ, и҆ стыждꙋ́сѧ.
Две́рь твою̀ не затворѝ мнѣ̀ тогда̀, гдⷭ҇и, гдⷭ҇и: но сїю ̀ѿве́рзи мѝ ка́ющемꙋсѧ тебѣ̀.
Оу҆слы́ши воздыха̑нїѧ дꙋшѝ моеѧ̀, сп҃се, и҆ прїимѝ ка̑пли ѻ҆́чїю моє́ю, и҆ сп҃си́ мѧ.
Чл҃вѣколю́бче, хотѧ́й всѣ̑мъ сп҃сти́сѧ, ты̀ воззови́ мѧ, и҆ ꙗ҆́кѡ бл҃гъ прїимѝ мѧ ка́ющасѧ.
Бг҃оро́диченъ: Пречⷭ҇таѧ бцⷣе дв҃о, є҆ди́на всепѣ́таѧ, молѝ прилѣ́жнѡ сп҃сти́сѧ на́мъ.
І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ, ма́ннꙋ ѡ҆дожди́вый и҆ во́дꙋ и҆з̾ ка́мене и҆сточи́вый дре́вле въ пꙋсты́ни лю́демъ мои̑мъ, десни́цею є҆ди́ною и҆ крѣ́постїю мое́ю.
Ви́дите, ви́дите, ꙗ҆́кѡ а҆́зъ є҆́смь бг҃ъ: слы́ши, дꙋшѐ моѧ̀, гдⷭ҇а вопїю́ща, и҆ ᲂу҆дали́сѧ ѿ пре́жнѧгѡ грѣха̀, и҆ бо́йсѧ ꙗ҆́кѡ сꙋдїѝ и҆ ꙗ҆́кѡ мздовозда́телѧ и҆ бг҃а.
Комꙋ̀ ᲂу҆подо́биласѧ є҆сѝ, многогрѣ́шнаѧ дꙋшѐ; ᲂу҆вы̀, пе́рвомꙋ ка́їнꙋ и҆ ламе́хꙋ ѻ҆́номꙋ, ꙗ҆́коже ка́менїемъ поби́вшаѧ тѣ́ло ѕлодѣ́йствы и҆ ᲂу҆би́вшаѧ ᲂу҆́мъ неразꙋ́мными стремле́ньми.
Всѧ̑, бы́вшыѧ пре́жде зако́на, проше́дши, ѽ дꙋшѐ, си́ѳꙋ не ᲂу҆подо́биласѧ є҆сѝ, ни є҆нѡ́сꙋ подража́ла є҆сѝ, ни є҆нѡ́хꙋ преложе́нїемъ, ни нѡ́еви: но ꙗ҆ви́ласѧ є҆сѝ скꙋ́дна жи́зни првⷣныхъ.
Є҆ди́на ѿве́рзла є҆сѝ хлѧ̑би гнѣ́ва, бг҃а твоегѡ̀, дꙋшѐ моѧ̀, и҆ потопи́ла є҆сѝ, ꙗ҆́коже зе́млю, всю̀ пло́ть и҆ дѣѧ̑нїѧ и҆ житїѐ, и҆ пребыла̀ є҆сѝ внѣ̀ сп҃си́тельнагѡ ковче́га.
Марі́и: Всѣ́мъ ᲂу҆се́рдїемъ и҆ любо́вїю притекла̀ є҆сѝ ко хрⷭ҇тꙋ̀, ѿ пре́жнѧгѡ грѣхо́внагѡ пꙋтѝ ѿвра́щшисѧ, и҆ въ пꙋсты́нѧхъ непроходи́мыхъ пита́ющисѧ, и҆ тогѡ̀ бж҃е́ствєнныѧ за́пѡвѣди чи́стѣ соверша́ющи.
Сла́ва, трⷪ҇ченъ: Безнача́льнаѧ, несозда́ннаѧ трⷪ҇це, нераздѣ́льнаѧ є҆ди́нице, ка́ющасѧ мѧ̀ прїимѝ, согрѣши́вша сп҃сѝ. твоѐ є҆́смь созда́нїе, не пре́зри: но пощадѝ мѧ̀ и҆ и҆зба́ви ѿ ѻ҆́гненнагѡ ѡ҆сꙋжде́нїѧ.
Бг҃оро́диченъ: Пречⷭ҇таѧ влⷣчце, бг҃ороди́тельнице, наде́ждо къ тебѣ̀ прибега́ющихъ и҆ приста́нище сꙋ́щихъ въ бꙋ́ри! млⷭ҇тиваго и҆ созда́телѧ и҆ сн҃а твоего̀ ᲂу҆ми́лостиви и҆ мнѣ̀ мл҃твами твои́ми.
Пѣ́снь г҃.
І҆рмо́съ: Оу҆твердѝ, гдⷭ҇и, на ка́мени:
Бл҃гослове́нїѧ си́мова не наслѣ́довала є҆сѝ, дꙋшѐ ѡ҆каѧ́ннаѧ: и҆ простра́ннагѡ ѡ҆блада́нїѧ, ꙗ҆́коже і҆а́феѳъ, не прїѧ́ла є҆сѝ на землѝ ѡ҆ставле́нїѧ.
Ѿ землѝ харра́нскїѧ грѣха̀ и҆зы́ди, дꙋшѐ моѧ̀, грѧдѝ въ зе́млю точа́щꙋю присножи́зненное нетлѣ́нїе, ю҆́же а҆враа́мъ наслѣ́дствова.
Ѡ҆ а҆враа́мѣ слы́шала є҆сѝ, дꙋшѐ моѧ̀, дре́вле ѡ҆ста́вльшемъ зе́млю ѻ҆те́чества и҆ бы́вшемъ пресе́льницѣ: сегѡ̀ произволе́нїю подража́й.
Оу҆ дꙋ́ба мамврі́йскагѡ ᲂу҆гости́въ а҆́гг҃лы, патрїа́рхъ наслѣ́дствова по ста́рости лови́твꙋ ѡ҆бѣтова́нїѧ.
І҆саа́ка разꙋмѣ́вши, ѡ҆каѧ́ннаѧ дꙋшѐ моѧ̀, ꙗ҆́коже но́вꙋю же́ртвꙋ, та́инственнѡ всесожига́емꙋю гдⷭ҇еви, подража́й є҆гѡ̀ произволе́нїю.
Ѡ҆ і҆сма́илѣ и҆згна́ннѣмъ, ꙗ҆́кѡ рабы́нино порожде́нїе, слы́шала є҆сѝ, дꙋшѐ моѧ̀: трезви́сѧ, блюдѝ, да не ка́кѡ подо́бно что̀ постра́ждеши сластолю́бствꙋющи.
Марі́и: Содержи́мь є҆́смь бꙋ́рею и҆ треволне́нїемъ согрѣше́нїй: но ты́, ма́ти, ны́нѣ мѧ̀ сп҃сѝ, и҆ ко приста́нищꙋ бж҃е́ственнагѡ покаѧ́нїѧ приведѝ.
Марі́и: Оу҆се́рдное моле́нїе и҆ ны́нѣ прине́сши ко бл҃госе́рдѣй мл҃твами твои́ми бцⷣѣ, ѿве́рзи мѝ, прпⷣбнаѧ, бж҃е́ствєнныѧ вхо́ды.
Сла́ва, трⷪ҇ченъ: Трⷪ҇це про́стаѧ, несозда́ннаѧ, безнача́льное є҆стество̀, въ трⷪ҇цѣ ѵ҆поста́сей воспѣва́емое, сп҃си́ ны, вѣ́рою покланѧ́ющыѧсѧ держа́вѣ твое́й.
Бг҃оро́диченъ: Ѿ ѻ҆ц҃а̀ безлѣ́тна сн҃а, неискꙋсомꙋ́жнѡ въ лѣ́то родила̀ є҆сѝ, бг҃ороди́тельнице,стра́нное чꙋ́до, пребы́вши дв҃а млеко́мъ пита́ющи.
Пѣ́снь д҃.
І҆рмо́съ: Оу҆слы́ша прⷪ҇ро́къ:
Тѣ́ломъ ѡ҆скверни́хсѧ, дꙋ́хомъ ѡ҆калѧ́хсѧ, ве́сь ѡ҆стрꙋпи́хсѧ: но ты̀, хрⷭ҇тѐ, ꙗ҆́кѡ вра́чь, ѻ҆боѧ̑ покаѧ́нїемъ мои́мъ ᲂу҆врачꙋ́й, ѿмы́й, ѡ҆чи́сти, ᲂу҆бѣлѝ, покажѝ, сп҃се мо́й, па́че снѣ́га чистѣ́йша.
Тѣ́ло твоѐ и҆ кро́вь положи́лъ є҆сѝ за всѣ́хъ, сло́ве, распина́емь: тѣ́ло ᲂу҆́бѡ, да мѧ̀ ѡ҆бнови́ши: кро́вь, да ѡ҆мы́еши мѧ̀: дꙋ́хъ же пре́далъ є҆сѝ, да мѧ̀ приведе́ши, хрⷭ҇тѐ, ко твоемꙋ̀ роди́телю.
Содѣ́лалъ є҆сѝ сп҃се́нїе посредѣ̀ землѝ, ще́дре, да сп҃се́мсѧ: во́лею на дре́вѣ распѧ́лсѧ є҆сѝ: є҆де́мъ затворе́нный ѿве́рзесѧ: гѡ́рнѧѧ, дѡ́льнѧѧ, тва́рь, ꙗ҆зы́цы всѝ сп҃се́ни покланѧ́ютсѧ тебѣ̀.
Кро́вь и҆з̾ ре́бръ твои́хъ да бꙋ́детъ мѝ кꙋпѣ́ль, вкꙋ́пѣ и҆ питїѐ, и҆сточи́вшее во́дꙋ ѡ҆ставле́нїѧ, да ѡ҆бою́дꙋ ѡ҆чища́юсѧ, помазꙋ́ѧсѧ и҆ пїѧ̀, ꙗ҆́кѡ пома́занїе и҆ питїѐ, сло́ве, животѡ́чнаѧ твоѧ̑ словеса̀.
Ча́шꙋ цр҃ковь стѧжа̀, рє́бра твоѧ̑ живонѡ́снаѧ, сп҃се на́шъ, и҆з̾ ни́хже и҆злїѧ́сѧ на́мъ сꙋгꙋ̑бый и҆сто́чникъ ѡ҆ставле́нїѧ и҆ вѣ́дѣнїѧ, во ѡ҆́бразъ двои́хъ вкꙋ́пѣ завѣ́тѡвъ, ве́тхагѡ и҆ но́вагѡ.
Лиши́хсѧ черто́га, лиши́хсѧ и҆ бра́ка, кꙋ́пнѡ и҆ ве́чери: свѣти́льникъ ᲂу҆гасѐ, ꙗ҆́кѡ без̾еле́йный, черто́гъ заключи́сѧ мнѣ̀ спѧ́щꙋ, ве́черѧ снѣде́сѧ: а҆́зъ же по рꙋкꙋ̀ и҆ нѡ́гꙋ свѧ́занъ, во́нъ и҆зве́рженъ є҆́смь.
Сла́ва, трⷪ҇ченъ: Нераздѣ́льное сꙋщество́мъ, несли́тное ли̑цы бг҃осло́влю тѧ̀, трⷪ҇ческое є҆ди́но бж҃ество̀, ꙗ҆́кѡ є҆диноца́рственное и҆ сопрⷭ҇то́льное: вопїю́ ти пѣ́снь вели́кꙋю, въ вы́шнихъ трикра́тнѡ пѣсносло́вимꙋю.
Бг҃оро́диченъ: И҆ ражда́еши и҆ дѣ́вствꙋеши, и҆ пребыва́еши во ѻ҆бои́хъ є҆стество́мъ дв҃а: рожде́йсѧ ѡ҆бновлѧ́етъ зако́ны є҆стества̀, ᲂу҆тро́ба же ражда́етъ неискꙋсомꙋ́жнаѧ. и҆дѣ́же хо́щетъ бг҃ъ, побѣжда́етсѧ є҆стества̀ чи́нъ: твори́тъ бо є҆ли̑ка хо́щетъ.
Пѣ́снь є҃.
І҆рмо́съ: Ѿ но́щи ᲂу҆́тренююща:
Нра́вомъ бы́хъ, гдⷭ҇и, ꙗ҆́кѡ тѧ́жкїй во ѡ҆ѕлобле́нїи фараѡ́нъ, дꙋше́ю же и҆ тѣ́ломъ, ꙗ҆́кѡ і҆анні́й и҆ і҆амврі́й, и҆ погрꙋже́нъ ᲂу҆мо́мъ: но помози́ ми.
Бре́нїю примѣси́хсѧ а҆́зъ ѡ҆каѧ́нный ᲂу҆мо́мъ: молю́ тѧ, влⷣко, ѡ҆мы́й мѧ̀ ба́нею мои́хъ сле́зъ, ѡ҆де́ждꙋ пло́ти моеѧ̀ ᲂу҆бѣли́въ ꙗ҆́кѡ снѣ́гъ.
А҆́ще и҆спыта́ю моѧ̑ дѣла̀, сп҃се, зрю̀ себѐ превозше́дша грѣхмѝ всѧ́каго человѣ́ка, занѐ въ ра́зꙋмѣ мꙋ́дрствꙋѧ согрѣши́хъ, не въ невѣ́дѣнїи.
Пощадѝ, пощадѝ, гдⷭ҇и, созда́нїе твоѐ: согрѣши́хъ, ѡ҆сла́би мѝ, ꙗ҆́кѡ є҆стество́мъ чи́стъ ты̀ є҆сѝ є҆ди́нъ, и҆ и҆́ный ра́звѣ тебє̀ никто́же є҆́сть без̾ скве́рны.
Менѐ ра́ди бг҃ъ сы́й, воѡбрази́лсѧ є҆сѝ въ мѧ̀, сп҃се, показа́лъ є҆сѝ чꙋдеса̀, и҆сцѣли́въ прокажє́нныѧ, и҆ разсла́бленнаго стѧгнꙋ́въ, и҆ то́къ кровоточи́выѧ ᲂу҆ста́вилъ прикоснове́нїемъ ри́зъ.
Марі́и: Стрꙋи̑ і҆ѡрда̑нскїѧ преше́дши, ѡ҆брѣла̀ є҆сѝ поко́й безболѣ́зненный, плотскі́ѧ сла́сти и҆збѣжа́вши, ѿ нЄ҆ѧ́же и҆ на́съ и҆зьмѝ твои́ми мл҃твами, прпⷣбнаѧ.
Сла́ва, трⷪ҇ченъ: Тѧ̀, трⷪ҇це, сла́вимъ, є҆ди́наго бг҃а: ст҃ъ, ст҃ъ, ст҃ъ є҆сѝ, ѻ҆́ч҃е, сн҃е и҆ дш҃е, про́стое сꙋщество̀, є҆ди́нице при́снѡ покланѧ́емаѧ.
Бг҃оро́диченъ: И҆з̾ тебє̀ ѡ҆блече́сѧ въ моѐ смѣше́нїе, нетлѣ́ннаѧ безмꙋ́жнаѧ мт҃и дв҃о, бг҃ъ созда́вый вѣ́ки, и҆ соединѝ съ собо́ю человѣ́ческое є҆стество̀.
Пѣ́снь ѕ҃.
І҆рмо́съ: Возопи́хъ всѣ́мъ се́рдцемъ мои́мъ:
Противꙋста́ни и҆ поборѝ, ꙗ҆́кѡже і҆исꙋ́съ а҆мали́ка, плотскі̑ѧ стра̑сти, и҆ гаваѡні́ты, прельсти́тєльныѧ по́мыслы, при́снѡ побѣжда́ющи.
Преидѝ, дꙋшѐ, текꙋ́щее є҆стество̀ вре́мене, ꙗ҆́кѡже пре́жде ковче́гъ, и҆ землѝ ѻ҆́ныѧ ѡ҆бѣтова́нныѧ бꙋ́ди во ѡ҆держа́нїе: бг҃ъ повелѣва́етъ.
Ꙗ҆́кѡже сп҃слъ є҆сѝ петра̀, возопи́вша сп҃сѝ: предвари́въ мѧ̀, сп҃се, ѿ ѕвѣ́рѧ и҆зба́ви, просте́ръ твою̀ рꙋ́кꙋ, и҆ возведѝ и҆з̾ глꙋбины̀ грѣхо́вныѧ.
Приста́нище ти́хое вѣ́мъ тѧ̀, влⷣко, влⷣко хрⷭ҇тѐ: но ѿ безмѣ́рныхъ глꙋби́нъ грѣха̀ и҆ ѿча́ѧнїѧ мѧ̀ предвари́въ и҆зба́ви.
Сла́ва, трⷪ҇ченъ: Трⷪ҇це є҆́смь про́ста, нераздѣ́льна, раздѣ́льна ли́чнѣ, и҆ є҆ди́ница є҆́смь є҆стество́мъ соедине́на, ѻ҆ц҃ъ глаго́летъ, и҆ сн҃ъ, и҆ бж҃е́ственный дх҃ъ.
Бг҃оро́диченъ: Оу҆тро́ба твоѧ̀ бг҃а на́мъ родѝ, воѡбраже́на по на́мъ: є҆го́же ꙗ҆́кѡ созда́телѧ всѣ́хъ молѝ, бцⷣе, да мл҃твами твои́ми ѡ҆правди́мсѧ.
Конда́къ:
Дꙋшѐ моѧ̀, дꙋшѐ моѧ̀, воста́ни, что̀ спи́ши; коне́цъ приближа́етсѧ, и҆ и҆́маши смꙋти́тисѧ.воспрѧнѝ ᲂу҆́бо, да пощади́тъ тѧ̀ хрⷭ҇то́съ бг҃ъ, вездѣ̀ сы́й и҆ всѧ̑ и҆сполнѧ́ѧй.
Пѣ́снь з҃.
І҆рмо́съ: Согрѣши́хомъ, беззако́нновахомъ:
Манассі́єва согрѣшє́нїѧ собрала̀ є҆сѝ, дꙋшѐ, и҆зволе́нїемъ, поста́вльши ꙗ҆́кѡ і҆́доѡлы стра̑сти, и҆ ᲂу҆мно́живши ме́рзѡсти: но тогѡ̀ покаѧ́нїю ревнꙋ́ющи те́плѣ, стѧжѝ ᲂу҆миле́нїе.
А҆хаа́вꙋ поревнова́ла є҆сѝ во скве́рнахъ, дꙋшѐ моѧ̀, ᲂу҆вы̀ мнѣ̀! была̀ є҆сѝ плотски́хъ скве́рнъ пребыва́лище и҆ сосꙋ́дъ сра́мленъ страсте́й: но и҆з̾ глꙋбины̀ твоеѧ̀ воздохнѝ, и҆ глаго́ли бг҃ꙋ грѣхѝ твоѧ̑.
Заключи́сѧ тебѣ̀ нб҃о, дꙋшѐ, и҆ гла́дъ бж҃їй пости́же тѧ̀, ꙗ҆́коже є҆гда̀ а҆хаа́въ словесє́мъ и҆лїѝ ѳесві́тѧнина не покори́сѧ нѣ́когда: но вдови́цѣ саре́птстѣй ᲂу҆подо́бисѧ, напита́й проро́чꙋ дꙋ́шꙋ.
Попалѝ и҆лїа̀ нѣ́когда два́жды пѧтьдесѧ́тъ і҆езаве́линыхъ, є҆гда̀ стꙋ̑дныѧ проро́ки погꙋбѝ, во ѡ҆бличе́нїе а҆хаа́вово: но и҆збѣга́й подража́нїѧ ѻ҆бои́мъ, дꙋшѐ, и҆ ᲂу҆крѣпи́сѧ.
Сла́ва, трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋ́щнаѧ, є҆ди́ница ст҃а́ѧ, свѣ́тове и҆ свѣ́тъ, и҆ ст҃а трѝ и҆ є҆ди́но ст҃о, пое́тсѧ бг҃ъ трⷪ҇ца. но ты̀, дꙋшѐ, воспо́й, просла́ви жи́знь и҆ жи̑зни, всѣ́хъ бг҃а.
Бг҃оро́диченъ: Воспѣва́емъ тѧ̀, бл҃гослови́мъ тѧ̀, покланѧ́емсѧ тѝ, бг҃ороди́тельнице: ꙗ҆́кѡ є҆ди́наго ѿ нераздѣ́льныѧ трⷪ҇цы породи́ла є҆сѝ сн҃а и҆ бг҃а, и҆ ѿве́рзла є҆сѝ на́мъ сꙋ́щымъ на землѝ нбⷭ҇наѧ.
Пѣ́снь и҃.
І҆рмо́съ: Є҆го́же вѡ́инства:
Правосꙋ́де сп҃се, поми́лꙋй, и҆ и҆зба́ви мѧ̀ ѿ ѻ҆гнѧ̀ и҆ преще́нїѧ, є҆́же и҆́мамъ на сꙋдѣ̀ пра́веднѡ под̾ѧ́ти: ѡ҆сла́би мѝ пре́жде конца̀, добродѣ́телїю и҆ покаѧ́нїемъ.
Ꙗ҆́кѡ разбо́йникъ вопїю́ ти: помѧни́ мѧ. ꙗ҆́кѡ пе́тръ пла́чꙋ го́рцѣ. ѡ҆сла́би мѝ, сп҃се: зовꙋ̀ ꙗ҆́кѡ мыта́рь, слезю̀ ꙗ҆́кѡ блꙋдни́ца. прїимѝ моѐ рыда́нїе, ꙗ҆́коже нѣ́когда ханане́ино.
Гное́нїе смире́нныѧ моеѧ̀ дꙋшѝ, сп҃се, и҆сцѣлѝ: є҆ди́не врачꙋ̀, пла́стырь мнѣ̀ наложѝ, и҆ є҆ле́й и҆ вїно̀, дѣла̀ покаѧ́нїѧ, ᲂу҆миле́нїе со слеза́ми.
Ханане́и подража́ѧ, и҆ а҆́зъ вопїю̀ сн҃ꙋ дв҃довꙋ: поми́лꙋй мѧ̀. каса́юсѧ кра́ѧ ри́зы, ꙗ҆́кѡже кровоточи́ваѧ: пла́чꙋ, ꙗ҆́коже ма́рѳа и҆ марі́а над̾ ла́заремъ.
Сла́ва, трⷪ҇ченъ: Безнача́льне ѻ҆́ч҃е, сн҃е собезнача́льне, ᲂу҆тѣ́шителю бл҃гі́й, дш҃е пра́вый: сло́ва бж҃їѧ роди́телю, ѻ҆ц҃а̀ безнача́льна сло́ве, дш҃е живы́й и҆ зи́ждѧй, трⷪ҇це є҆ди́нице поми́лꙋй мѧ̀.
Бг҃оро́диченъ: Внꙋ́трь во чре́вѣ твое́мъ, пречⷭ҇таѧ, мы́сленнаѧ порфѵ́ро є҆мманꙋ́илева, ꙗ҆́кѡ ѿ ѡ҆багре́нїѧ червлени́цы, пло́ть соистка́сѧ: сегѡ̀ ра́ди тѧ̀ бцⷣꙋ вои́стиннꙋ почита́емъ.
Пѣ́снь ѳ҃.
І҆рмо́съ: Безсѣ́меннагѡ зача́тїѧ:
Недꙋ́ги и҆сцѣлѧ́ѧ, ни́щымъ бл҃говѣствова́ше хрⷭ҇то́съ сло́во: хромы̑ѧ ᲂу҆врачева̀, съ мытари̑ ꙗ҆дѧ́ше, со грѣ̑шники бесѣ́доваше: і҆аі́ровы дще́ре дꙋ́шꙋ пред̾ꙋме́ршꙋю возвратѝ прикоснове́нїемъ рꙋкѝ.
Мыта́рь сп҃са́шесѧ, и҆ блꙋдни́ца цѣломꙋ́дрствоваше, фарїсе́й же хвалѧ́сѧ ѡ҆сꙋжда́шесѧ. ѻ҆́въ ᲂу҆́бѡ: млⷭ҇тивъ бꙋ́ди мѝ: ѻ҆́ва же: поми́лꙋй мѧ̀. се́й же велича́шесѧ, вопїѧ̀: бж҃е, бл҃годарю́ тѧ: и҆ про́чыѧ безꙋ̑мныѧ глаго́лы.
Закхе́й мыта́рь бѣ̀, но ѻ҆ба́че сп҃са́шесѧ, и҆ фарїсе́й сі́мѡнъ соблажнѧ́шесѧ, и҆ блꙋдни́ца прїима́ше ѡ҆ста́витєльнаѧ разрѣшє́нїѧ ѿ и҆мꙋ́щагѡ си́лꙋ ѡ҆ставлѧ́ти грѣхѝ: то́й потщи́сѧ, дꙋшѐ, подража́ти.
Блꙋдни́цѣ, ѽ ѡ҆каѧ́ннаѧ дꙋшѐ моѧ̀, не поревнова́ла є҆сѝ, ꙗ҆́же прїи́мши мѵ́ра а҆лава́стръ, со слеза́ми пома́за и҆ власмѝ ѡ҆тре́ но́зѣ гдⷭ҇ꙋ, пре́жнихъ согрѣше́нїй є҆ѧ̀ рꙋкописа́нїе раздира́ющемꙋ.
Гра́ды, и҆̀мже дадѐ хрⷭ҇то́съ бл҃говѣ́стїе, дꙋшѐ моѧ̀, ᲂу҆вѣ́дала є҆сѝ, ка́кѡ про́клѧти бы́ша. ᲂу҆бо́йсѧ ᲂу҆каза́нїѧ, да не бꙋ́деши ꙗ҆́коже ѻ҆́ни: ты̑ѧ бо содо́млѧнѡмъ ᲂу҆подо́бивъ, влⷣка да́же до а҆́да ѡ҆сꙋдѝ.
Да не го́ршаѧ, ѽ дꙋшѐ моѧ̀, ꙗ҆ви́шисѧ ѿча́ѧнїемъ, ѡ҆ вѣ́рѣ ханане́и слы́шавшаѧ: є҆ѧ́же ра́ди дщѝ сло́вомъ бж҃їимъ и҆сцѣли́сѧ. сн҃е дв҃довъ, сп҃сѝ и҆ менѐ, воззовѝ и҆з̾ глꙋбины̀ се́рдца, ꙗ҆́коже ѻ҆на̀ хрⷭ҇тꙋ̀.
Сла́ва, трⷪ҇ченъ: Ѻ҆ц҃а̀ просла́вимъ, сн҃а превознесе́мъ, бж҃е́ственномꙋ дх҃ꙋ вѣ́рнѡ поклони́мсѧ, трⷪ҇цѣ нераздѣ́льнѣй, є҆ди́ницѣ по сꙋществꙋ̀, ꙗ҆́кѡ свѣ́тꙋ и҆ свѣ́тѡмъ, и҆ жи́зни и҆ жи́знемъ, животворѧ́щей и҆ просвѣща́ющей концы̀.
Бг҃оро́диченъ: Гра́дъ тво́й сохранѧ́й, бг҃ороди́тельнице пречⷭ҇таѧ: въ тебѣ́ бо се́й вѣ́рнѡ ца́рствꙋѧ, въ тебѣ̀ и҆ ᲂу҆твержда́етсѧ, и҆ тобо́ю побѣжда́ѧ, побѣжда́етъ всѧ́кое и҆скꙋше́нїе, и҆ плѣнѧ́етъ сꙋпоста́ты, и҆ ᲂу҆строѧ́етъ владѡ́мыѧ.
Прпⷣбне ѻ҆́тче а҆ндре́е, молѝ бг҃а ѡ҆ на́съ.
А҆ндре́ю: А҆ндре́е честны́й и҆ ѻ҆́тче требл҃же́ннѣйшїй, па́стырю кри́тскїй, не преста́й молѧ́сѧ ѡ҆ воспѣва́ющихъ тѧ̀, да и҆зба́вимсѧ всѝ ѿ гнѣ́ва и҆ ско́рби и҆ тлѣ́нїѧ, и҆ свободи́мсѧ ѿ прегрѣше́нїй, чтꙋ́щїи твою̀ па́мѧть вѣ́рнѡ.
Та́же пое́мъ ѻ҆́ба ли̑ка і҆рмо́съ: Безсѣ́меннагѡ зача́тїѧ:
Подо́бнѣ и҆ про́чее послѣ́дованїе повече́рїѧ.
